Buon Compleanno

L'autore di questa bella poesia è mio fratello Luciano, l'ha scritta in dialetto Valpolicellese.


                                                                                                      San Floriano 21 agosto 2014


I sesantani dell'Angiolina

Cara sorela te ghè sessantani e no te se pi na buteleta,
me par en possibile come tutto sto tempo el sia passà cossi en freta.

Quanti bei ricordi della nostra infansia a Prognol, en quela corte contadina,
ghera tanti buteleti e se sugaa tuti ensieme fin da le prime ore dela matina.

Ne sveiaa el profumo del late caldo sula stua,
prima ancora che el sol el spuntasse da la Masua.

Se sugaa a s-cianco e a salta moleta,
quante corse se fasea ne la corte con na sola bicicleta.

Se sugaa a scondilevro e a campanò,
se corea sula tesa e dal mucio de fen se sbrisciaa sò.

Par nar a scola fin a Maran, quanto e quanto caminar,
e quando se tornaa a casa ghera le vache da portar a pascolar.

Al bupà e ala mama ghe tocà strucar i denti ancora piassè streti,
quando con na sola scciopetà è arivà du gemeleti.

Par el Gigi no ghera pi leti da dormir,
e cossi par el colegio ghe tocà partir.

Però che festa quando le tornà e quanti sorisi,
per l'ocasion la Gina la fato le lasagne con i bisi.

Non en mai perso la messa quando lera festa,
el Dolfo el fasea sempre tri o quatro giri par portarne tuti con la vespa.

Pi tardi, a San Fioran sen vegnui a star,
e anca ti dopo le medie da le suore te se na a laorar.

Ma quando te ghè cambià laoro e te se nà al Sacro Cuor,
te ghè conosuo Osvaldo che da subito el tà  robà el cor.

Ve si fati la vostra bela fameia,
ve volì tanto ben, si proprio na smaraeia.

Tra noantri fradei sen sempre restè uniti e ne sen volui benon,
anca quando el bupà e la mama, con poche forse, i gavea bison.

En quei periodi a capo de l'organizasion te ghe sere ti,
che fortuna averghe na sorela!.... la dona en fameia la dà sempre de pì.

Noantri fradei e cugnè, par questa ocasion volen farte en regalin,
che quando te se en pò so' de corda te posse tegnerte su en pochetin.

El regal più belo però la te le fa la to Claudieta,
che proprio stano la te fa dentar nona de na buteleta.

Te auguren de esser forte e de star sempre ben,
parchè te gavarè da far la nona quasi a tempo pien.

Buon compleanno con tuto el cor e con en grosso abracio................. Luciano

Luciano e Francesca, Dino e Luigina, Gigi e Daniela, Dario e Rosanna

Commenti

Post più popolari